Текст тропаря, кондака и молитвы святителю Симеону, первому епископу Тверскому
(память 3/16 февраля и в соборах Белорусских и Тверских святых)
Тропарь, глас 3
Земли Полоцкия плод благословенный,/ архиерейским саном почтен был еси,/ святителю отче Симеоне,/ Тверския епархии первопрестольниче,/ паствы твоея добрый устроителю,/ немудрых наказателю, беззаконных обличителю./ Молися ко Господу// о всех почитающих память твою.
Кондак, глас 4
Мерило праведное/ явился еси, отче наш Симеоне,/ житию Евангельскому паству твою неустанно научал еси,/ сего ради во свете невечернем пребываеши/ от Единицы Трисолнечныя увенчанный./ Темже и нас ко спасению настави// богоприятными твоими молитвами.
Молитва святителю Симеону
О, святителю Симеоне пречудне, первый иерарше земли Тверския, православныя веры блюстителю, князя страстотерпца Михаила наставниче и собора Спасова Златоверхаго строителю и присный о созидании храмов ревнителю!
От лет древних яко сугуба печальника за Русь Святую Господь призва тя, преселив от страны западныя и собрав под омофор твой святый люди полоцкия и тверския, аще и различныя правители земныя имущия, но тя единаго отца духовнаго и заступника стяжавшия.
Ей, святче Божий, помози нам, якоже и сим прежде, токмо по глаголом Евангельским жити, веру православную сохранити, во благочестии и страсе Божии присно пребывати. Се бо мы свидетели есмы, яко деяния рук человеческих преходят, словеса же Господня не мимоидут и утвержденное на камени краегольнем присно пребывает, аще и испытание терпит.
О, святителю Христов преславне, буди ходатай за ны пред Престолом Вседержителевым! Аще и мощи твоя святыя от мира сокровены суть, но духом твоим от нас не отступаеши. Сего ради усердно молим тя: скорбящия утеши, малодушныя вразуми, отроки во благочестии настави, иноки в молитве укрепи, священники в безпорочнем служении утверди, воинству христолюбивому победы на супостаты испроси, властем добре правити помози и всех нас ко спасительному жительству направи Твоими богоприятными молитвами, да непрестанно славим неизреченное человеколюбие Отца и Сына и Святаго Духа ныне и присно и во веки веков. Аминь.
