Господи Иисусе Христе Боже наш, вся яже ко спасению нашему строяй и гласом трубным ветхия жертвы возвещати повелевый и во гласе Архангелове и трубе Божии приити хотяй, Сам и ныне услыши моления нас, недостойных рабов Твоих, и молитвами святителя Симеона, перваго епископа Тверскаго, святаго благовернаго великаго князя Михаила Тверскаго и матери его благоверныя княгини Ксении ниспосли скорую Твою помощь в возсоздании звонов кафедральнаго храма в честь преславнаго Твоего Преображения, во еже по вся дни оглашатися стольному граду нашему Твери благовествованием спасения Твоего и звати люди Твоя на славословие имене Твоего Святаго и на общия молитвы церковныя и отгоняти от нас вся воздушная приражения, бури же и ветры зельныя, наипаче же пробуждати сердца верных твоих к деланию заповедей Твоих.
Ей убо, Господи, ведый вся прежде прошения нашего, Сам буди управитель делу сему, боголюбивых же строителей и жертвователей благослови и вся потребная к возсозданию звонов кафедральнаго храма Тверскаго Твоим Божественным Промыслом устрои. Да и в сих прославится всесвятое и великолепое имя Отца и Сына и Святаго Духа во веки веков. Аминь.
