Священник: Благословен Бог наш, всегда ныне и присно и во веки веков.
Люди: Аминь.
Слава Тебе, Боже наш, слава Тебе.
Люди: Царю Небесный, / Утешителю, Душе истины, / Иже везде сый / и вся исполняяй, / Сокровище благих/и жизни Подателю, / прииди и вселися в ны, / и очисти ны от всякия скверны,/ и спаси, Блаже, души наша.
Чтец: Святый Боже, Святый Крепкий, Святый Безсмертный, помилуй нас. (Трижды) Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый,посети и исцели немощи наша, имене Твоего ради.
Господи, помилуй. (Трижды) Слава, и нынe:
Люди: Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже имы оставляем должником нашим; и не введи нас во искушение, но избави нас от лукаваго.
Священник: Яко Твое есть царство Отца и Сына и Святаго Духа, ныне и присно и во веки веков.
Люди: Аминь.
Священник (Диакон): Миром Господу помолимся. Люди: Господи, помилуй.
О свышнем мире и о спасении душ наших Господу помолимся Люди: Господи, помилуй.
О мире всего мира, благостоянии святых Божиих Церквей и соединении всех Господу помолимся.
Люди: Господи, помилуй.
О еже очистити нас от грехов и беззаконий наших, изсушающих в нас любовь к Богу и к ближним, водрузитиже оную силою, действом и благодатию Пресвятаго Своего Духа и вкоренити в сердца всех нас, прилежно Господу помолимся.
Люди: Господи, помилуй.
О еже всеяти в нас и благодатию Пресвятаго Своего Духа вкоренити новую Своего Новаго Завета заповедьлюбити друг друга и не себе угождати, но о славе Божией и о созидании ближняго всегда ревновати, Господу помолимся.
Люди: Господи, помилуй.
О еже искоренити в нас ненависть, зависть, злобу и все прочие страсти, братолюбие разрушающия, и нелицемерную любовь всеяти, усердно Господу помолимся.
Люди: Господи, помилуй.
О еже теплую любовь к Богу и к ближним в нас благодатию Пресвятаго Своего Духа распалити, и тою все страсти душ и телес наших из корене сожещи, Господу помолимся.
Люди: Господи, помилуй.
О еже искоренити в нас страсть самолюбия, добродетель же братолюбия силою Пресвятаго Своего Духа вкоренити, сердцем сокрушенным Господу помолимся.
Люди: Господи, помилуй.
О еже не любити нам мира и всего яже в мире, но истинною любовию Бога и славу Его, и пользу и спасение ближних возлюбити, и на небеси уготованная благая присно зрети, и искати сих вседушно, Господу помолимся.
Люди: Господи, помилуй.
О еже принудити нас силою, действом и благодатию Пресвятаго Своего Духа не точию друзей и братий наших, но и врагов истинно любити, и ненавидящим нас благотворити, о них молитися, и о спасении их тщание имети, Господу помолимся.
Люди: Господи, помилуй.
О еже себе внегда внимати, себя окаявати и своя согрешения всегда зрети, себя пред Богом и пред всеми смиряти, брата никогдаже осуждати, но яко самаго себя того любити, силою, действом и благодатию Пресвятаго Духа, Господу помолимся.
Люди: Господи, помилуй.
О еже поревновати нам древних христиан к Богу и к братиям горящей любви, и наследниками и преемниками тех быти, не образом точию, но детельною истиною, силою, действом и благодатию Пресвятаго Духа, Господу помолимся.
Люди: Господи, помилуй.
О еже в правоверии непозыблемых, в мире и союзе любви горящих, и во всех добродетелях преспевающих нас всегда сохранити и от всех душетленных страстей невредимыми соблюсти, силою, действом и благодатию Пресвятаго Духа, Господу помолимся.
Люди: Господи, помилуй.
О избавитися нам от всякия скорби, гнева и нужды Господу помолимся. Люди: Господи, помилуй.
Заступи, спаси, помилуй и сохрани нас, Боже, Твоею благодатию. Люди: Господи, помилуй.
Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга и весь живот наш Христу Богу предадим.
Люди: Тебе, Господи.
Священник: Яко подобает Тебе всякая слава, честь и поклонение Отцу и Сыну и Святому Духу, ныне и присно и во веки веков.
Люди: Аминь.
Священник: Бог Господь и явися нам, благословен Грядый во имя Господне. Исповедайтеся Господеви, яко благ, яко в век милость Его.
Люди: Бог Господь и явися нам, благословен Грядый во имя Господне. Священник: Обышедше обыдоша мя и именем Господним противляхся им. Люди: Бог Господь и явися нам, благословен Грядый во имя Господне.
Священник: Не умру, но жив буду и повем дела Господня.
Люди: Бог Господь и явися нам, благословен Грядый во имя Господне.
Священник: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.
Люди: Бог Господь и явися нам, благословен Грядый во имя Господне. Люди: (Тропарь, глас 4):
Союзом любви апостолов Твоих связавый, Христе, / и нас Твоих верных рабов/ к Себе тем крепко связав, / творити заповеди Твоя и друг друга любити нелицемерно сотвори, / молитвами Богородицы, Едине Человеколюбче.
Слава, и ныне. Кондак, глас 5-й:
Пламенем любви к Тебе распали сердца наша, Христе Боже, / да тою разжигаеми, / сердцем, мыслиюже и душею, / и всею крепостию нашею возлюбим Тя, / и ближних наших яко себя, / и повеления Твоя храняще, / славим Тя, всех благ Дателя.
Священник: Вонмем. Мир всем. Чтец: И духове Твоему.
Священник: Премудрость, Вонмем.
Чтец: Прокимен, глас 7: Возлюблю Тя, Господи, крепосте моя, Господь утверждение мое.
Люди: Возлюблю Тя, Господи, крепосте моя, Господь утверждение мое. Чтец: Бог мой, Помощник мой и уповаю на Него.
Люди: Возлюблю Тя, Господи, крепосте моя, Господь утверждение мое. Чтец: Возлюблю Тя,Господи, крепосте моя,
Люди: Господь утверждение мое. Священник:Премудрость.
К Коринфянам послания святаго апостола Павла чтение, зач. 153 от полу (1 Кор. 13, 1–8а, 13; 14, 1а).
Братие, аще языки человеческими глаголю и ангельскими, любве же не имам, бых яко медь звенящи, или кимвал звяцаяй: И аще имам пророчество, и вем тайны вся и весь разум, и аще имам всю веру, яко и горы преставляти, любве же не имам, ничтоже есмь. И аще раздам вся имения моя, и аще предам тело мое во еже сжещи е, любве же не имам, никая польза ми есть. Любы долготерпит, милосердствует; любы не завидит, любы не превозносится, не гордится, ни безчинствует, не ищет своя си, не раздражается, не мыслит зла, не радуется о неправде, радуется же о истине, вся любит, всему веру емлет, вся уповает, вся терпит. Любы николиже отпадает. Ныне же пребывает вера, надежда, любы, три сия: больше же сих любы. Держитеся любве.
Аллилуия, глас 8:
Стих 1: Возлюбите Господа вси преподобнии Его. Стих 2: Яко истины взыскает Господь.
Священник: Премудрость. Прости. Услышим Святаго Евангелия. Мир всем.
Люди: И духови твоему.
От Иоанна Святаго Евангелия чтение, зач. 46 от полу (13, 34–35; 15, 12–14).
Люди: Слава Тебе, Господи, слава Тебе. Священник: Вонмем.
Рече Господь Своим учеником, заповедь новую даю вам, да любите друг друга: якоже возлюбих вы, да и вы любите себе. О сем разумеют вси, яко Мои ученицы есте, аще любовь имате между собою. Сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя.
Вы друзи Мои есте, аще творити, елика Аз заповедаю вам.
Люди: Слава Тебе, Господи, слава Тебе.
Священник: Помилуй нас, Боже, по велицей милости Твоей, молим Ти ся, услыши и помилуй.
Люди: Господи, помилуй (трижды).
Господи Боже наш, милостивно яко Благ призри на изсохшую в любви землю сердца нашего, тернием ненависти, самолюбия и неисчетных беззаконий люте оляденевшую, и каплю благодати Пресвятаго Твоего Духа испустив, богатно ороси сию, да будет плодоносна и возрастит от горящей к Тебе любви корень всех добродетелей, страх Твой, и о спасении ближняго неленостное попечение, всех же страстей имногообразных лукавств и лицемерия искоренение, прилежно яко всех благ Дателя молим, скоро услышии человеколюбно помилуй.
Люди: Господи, помилуй (трижды).
Заповедь Твою любити друг друга давый Твоим ученикам, Владыко, обнови сию благодатию Пресвятаго Твоего Духа действительно в душах и в сердцах наших, да николиже о своей токмо пользе, но всегда о благоугождении Тебе и о спасении и пользе ближних наших попечение творити потщимся, молимся Тебе, Благодателю Милостивый, услыши и помилуй.
Люди: Господи, помилуй (трижды).
Первую и большую заповедь, любити Тебя, Бога и Творца нашего, от всея души, от всея мысли и крепости нашей, и вторую, подобную ей, любити ближних наших, яко самих себя даровавый нам, Владыко. Сам подвигни нас делом сия исполняти, да Тебе
Спасу нашему угождающе и о спасении ближних наших ревнующе, обетованная Твоя получим благая, яко Владыце и Спасу нашему, прилежно припадающе, молимся, скоро услыши и помилуй.
Люди: Господи, помилуй (трижды).
Да совершени в любви к Тебе, Боже наш, будем, к ближним нелицемерную любовь иметь подвигни нас Твоего Духа благодатию, Владыко. К Тебе бо любовь имети мняйся, брата же своего ненавидяй, ложь есть и во тьме ходит. Тем же, Милостиве, любовию к Тебе и к братии распали души и сердца наши молимся, яко Милостив скоро услыши и яко Щедр помилуй.
Люди: Господи, помилуй (трижды).
Сице в нас Твою любовь силою благодати Пресвятаго Твоего Духа, всели, Всещедрый Господи, да не точию братию и друзей, но и врагов наших по Твоему Божественному повелению истинно любити и ненавидящим нас благотворити будет, и о спасении их искренно тщатися, молимся Тебе, благости Источниче в человеколюбия Пучино, скоро услыши и яко Благосерд помилуй.
Люди: Господи, помилуй (трижды). Люди: Господи, помилуй(трижды).
Священник: Давый заповедь Твою нам, еже любити Тебе Бога нашего и ближняго своего, сотвори, да ненависти, вражды, обиды, мздоимства, кровопролития и прочая беззакония прекратятся, истинная же любовь да царствует в людех народов православных, молим Ти ся, Спасителю наш, услыши и милостив нопомилуй.
Люди: Господи, помилуй (трижды).
Священник: Услыши ны, Боже, Спасителю наш, упование всех концев земли и сущих в мори далече, и милостив, милостив буди, Владыко, о гресех наших, и помилуй ны.
Милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.
Люди: Аминь.
Священник: Господу помолимся. Люди: Господи,помилуй.
Молитва Господу Иисусу Христу:
Господи Иисусе Христе Боже наш, давый ученикам Твоим заповедь новую любити друг друга, приими молитву сию во оставление грехов всех нас, смиренных рабов Твоих, и иссякшую в нас к Тебе и к братиям любовь Духом Твоим Святым обнови и крепко сию водрузи в сердца наши, да тою заповеди Твои исполняюще, не своей пользы на земле искати, но о Твоей славе и о созидании и спасении ближних ревновати будем, да тако в любви и мире со всеми в веке сем поживше, сподобимся, вкупе с угодившими Тебе, в горних обителях славити Тя и Безначального Твоего Отца и Святаго Духа в бесконечные веки веков.
Люди: Аминь.
Священник: Премудрость. Пресвятая Богородице, спаси нас.
Люди: Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Священник: Слава Тебе, Христе Боже, упование наше, слава Тебе.
Люди: Слава Отцу и Сыну и Святому Духу, и ныне и присно и во веки веков. Аминь. Господи, помилуй(трижды). Благослови.
Священник: Христос истинный Бог наш, молитвами Пречистыя Своея Матери, святаго славнаго и всехвальнаго апостола и евангелиста Иоанна Богослова и всех святых помилует и спасет нас, яко Благ и Человеколюбец
Аминь. Аминь.
