Иерей: Благословен Бог наш всегда, ныне и присно, и во веки веков.
Лик: Аминь. Царю Небесный:
Таже чтец: Трисвятое. Пресвятая Троице: Отче наш:
Возглас: Яко Твое есть Царство, и сила и слава, Отца, и Сына, и Святаго Духа, ныне и присно, и во веки веков.
Чтец: Аминь. Господи, помилуй, 12.
Слава, и ныне:
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу нашему.
Господи, услыши молитву мою, внуши моление мое во истине Твоей:
Слава, и ныне: Аллилуия, трижды.
Ектения великая: Миром Господу помолимся:
…
О плавающих, путешествующих, недугующих, страждущих, плененных, и о спасении их Господу помолимся.
О рабех Божиих (имярек), недугом неисцельным страждущих, и о еже простити им всякое прегрешение, вольное и невольное, и милостиву быти им, Господу помолимся.
О еже стяжати им и сродником их плод веры, чистым сердцем в терпении приносимый, и упование непостыдное, Господу помолимся.
О еже посетити я посещением Святаго Своего Духа, и ослабити болезнь неисцельную, в них гнездящуюся, славы ради имене Своего, Господу помолимся.
Заступи, спаси, помилуй и сохрани нас, Боже, Твоею благодатию.
…
Возглас: Яко подобает Тебе всякая слава:
Бог Господь, и явися нам, благословен Грядый во имя Господе.
Стих1: Исповедайтеся Господеви, яко Благ, яко в век милость Его.
Стих 2: Обышедше обыдоша мя, и именем Господним противляхся им.
Стих 3: Не умру, но жив буду, и повем дела Господня.
Стиx 4: Камень, егожа небрегоша зиждущии, сей бысть во главу угла: от Господа бысть сей, и есть дивен во очесех наших.
Страстотерпче святый, царевиче Алексие, / ты терпением страданий издетска / послушанию воли Божией и терпению навыкл еси, / темже и в болезни неисцельной сущим / ослабу молитвами твоими подаждь, / велие бо дерзновение / стяжал еси ко Господу.
Не имамы иныя помощи:
Д. Святый страстотерпче царевиче Алексие, моли Бога о нас
Хор. Святый страстотерпче царевиче Алексие, моли Бога о нас (дважды)
Слава Отцу, и Сыну, и Святому Духу
И ныне, и присно, и во веки веков, аминь.
Святому: Моли Бога о нас, святый страстотерпче царевиче Алексие,/ яко мы усердно/ к тебе прибегаем,/ скорому помощнику и молитвеннику о душах наших.
Таже малая ектения с возгласом: Ты бо еси Царь мира, и Спас душ наших, и Тебе славу возсылаем, Отцу, и Сыну, и Святому Духу, ныне и присно, и во веки веков.
Лик: Аминь.
Таже: Достойно есть: Трисвятое, по Отче наш: и тропари: Помилуй нас, Господи, помилуй нас:
Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (трижды).
Еще молимся о Великом Господине и отце нашем Святейшем Патриархе Кирилле и о господине нашем высокопреосвященнейшем митрополите (или архиепископе или преосвященнейшем епископе) имярек, и о всей во Христе братии нашей.
Еще молимся о богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Еще молимся, о еже страждущим от недуга неисцельнаго ток крове затворити и благомощие подати, рцем вси, Господи, услыши и милостивно помилуй.
Еще молимся, о еже в немощи терпение, в скорби утешение, в недузе телесном здравие духовное сим даровати, рцем вси, Господи, услыши и милостивно помилуй.
Еще молимся, о еже врачем мудрость, страждущим от недугов и сродником их веру жены хананеины низпослати, рцем вси, Господи, услыши и милостивно помилуй.
Еще молимся о милости, жизни, мире, здравии, спасении, посещении, прощении и оставлении грехов рабов Божиих (имярек).
Еще молимся за всю братию, и за вся христианы.
Возглас: Яко милостив и Человеколюбец Бог еси, и Тебе славу возсылаем, Отцу, и Сыну, и Святому Духу, ныне, и присно, и во веки веков.
Лик: Аминь.
О святый страстотерпче, царевиче Алексие! Ты по молитвам преподобнаго Серафима от венценосных супругов рожден был еси, да славу царства земнаго восприимеши, обаче многоболезненно и кратко житие твое бысть и кончина скорбна. Сего ради убо к славе Царства Небеснаго непреткновенно возшел еси и ныне со всеми святыми во свете невечернем и радости нетленней пребываеши, но и в юдоли земной сущим соболезнуеши, наипаче же от недуга неисцельнаго, яко и ты иногда, страждущим. Темже молим тя: яко веси страдание земное, страждущия молитвами твоими в терпении укрепи; яко зриши славу Небесную, унывающия светом ея озари; яко Христу верен даже до смерти пребыл еси, сподоби и нас крест свой во смирении понести. Да прославим купно с тобою и лики Небесными пречестное и великолепое имя Отца, и Сына, и Святаго Духа.
Лик: Аминь.
Также величание.
Иерей: Премудрость: Пресвятая Богородице, спаси нас.
Лик: Честнейшую херувим:
Иерей: Слава Тебе, Христе Боже, Упование наше, слава Тебе.
Лик: Слава, и ныне: Господи, помилуй, (трижды). Благослови.
Иерей отпуст:
Христос истинный Бог наш, молитвами Пречистыя Своея Матере, преподобных и богоносных отец наших, святаго страстотерпца царевича Алексия и всех святых, помилует и спасет нас, яко Благ и Человеколюбец.
Лик: Аминь.
